Обичен-необичен летен предизвик за креативна, научна, творечка мобилизација

и сензомоторна стимулација на дечиња од 3 до 10 години

Летото е време за одмор, за нас и нашите дечиња но сепак и сега и секаде продолжува работа за нас, возрасните. Нашата секојдневна мисија е посредно, непосредно и континуирано да влијаеме на градење на квалитетни ставови, позитивни навики, потреби, хоби, вештини, знаења, однесувања на нашите дечиња. Ние можеме да бидеме нивниот омилен јунак чии игри ќе се паметат и прераскажуваат на генераците, позитивен модел кој детето ќе го следи и имитира во својот живот како возрасен и како родител, некогаш со свои деца. Можеме од време на време да им подаруваме забава со наука, творење, читање, пишување и истражување за време на летниот одмор, затоа што тоа и ним и нам ни е корисно. Зошто?

Затоа што така, пред себе и со себе дечињата ќе имаат успешен модел на посветен, несебичен родител, баба, дедо кој умее и сака да најде време и начин како да го вклопи своето детенце и неговите потреби во своето возрасно секојдневие исполнето со многу различни обврски.

Затоа што дечињата ќе имаат до себе возрасен пријател кој сака да си игра со нив, а тоа е основа за градење поврзаност, доверба, близина, која подоцна лично нам на возрасните ќе ни биде потребна, за да имаме отворен пат да допреме до нив со совети низ разни ситуации за време на нивното растење и секогаш да останеме блискиот пријател со кој може да се сподели и голема тајна и проблем и среќа.

Сигурна сум дека секој од нас има барем по неколку интересни активности кои со носталгија ги раскажува и ќе ги раскажува до старост, доживувања овозможени од страна на нашите родители или некој од возрасните од нашата околина. Затоа ајде и ние да придонесеме за градење убави спомени и позитивни примери за идентификација.

И што е најважно, на овој начин, преку креативна анимација на нашите дечиња ние нема да дозволиме навиките и вештините кои нашето дете ги стекнало во текот на учебната година или за време на месеците поминати во градинка, да се заборават, да не се одржуваат и напредуваат само затоа што е лето и затоа што некои за жал, летото го толкуваат и поминуваат само како време за пасивен одмор.

Кога е време за вакви креативни анимации на дечињата? Секогаш, кога и да најдеме прилика и нова идеја во која и самите ќе уживаме.

Каде? На секое можно место, било да е плажа, планина, парк или во нашиот дом..

Средства? Фломастери, ножички, моливче, нотес и лепило се нашиот основен прибор кој верувајте, навистина треба патува со нас за време на секое наше патување независно од тоа дали во моментот имаме или немаме идеја за нивна примена. Понатаму, природата и отпадниот материјал лесно ќе ни се вклопат за да го надополнат фондот на останати ресури кои можеме да ги искористиме...

Во следниве прилози опишани се различни, интересни активности, лесно применливи а интересни дури и за нас возрасните. 

http://ucimenizigra.ucoz.com/index/nasheto_neobichno_pe_zazhno_slikarstvo/0-396

http://ucimenizigra.ucoz.com/index/pe_zazhna_kuti_a_dom_na_nashite_zhivi_spomeni/0-397

http://ucimenizigra.ucoz.com/index/detska_pe_zazhna_arkhitektura_kreativno_modelira_e/0-398

http://ucimenizigra.ucoz.com/index/ta_nata_na_drvenoto_kovche_e_domashna_dekoraci_a_za_tvorechka_stimulaci_a/0-394

Aвтор Весела Б. јули 2016